用 Hugo 試下起咗個 site 出嚟，試咗幾日，覺得都算易上手，但資訊量太大，對我嚟講太多新嘢，有啲消化唔到。
我用 Joplin 都差不多兩年，一開始係返香港做廢青嗰陣，正直肺炎起飛嘅時候，有成兩個月時間都搵唔到工。
一開始係睇咗啲雞湯文，諗住寫下 notes，於是就用咗 Evernote，佢係 WYSIWYG，但我係有少少強逼症，用呢啲會好嬲，同埋會用好多時間。
一開始咩都寫啲，咩都學啲，有用嚟做剪報，又學寫 code，又 plan 下嘢咁。
學寫 web 好隨心，嗰陣想寫個 profile 出嚟當 CV 咁用，依家興吖嘛，整下整下就越整越多嘢，對自己都多咗啲發現。
其實我唔係怕嘥時間，我係怕做重覆嘅嘢，都算係解釋到點解我唔中意 WYSIWYG - 如果可以㩒一下就搞掂嘅嘢，點解我要㩒十下先做得完？
呢樣嘢我喺做功課嗰陣已經開始做緊，上當年大家都對住個 Visual Studio C++ 手排 UI，我已經㩒咗去 managed code 嗰版用 loop 嚟排，就算學校唔教我都要咁做，因為我接受唔到逐隻逐隻排。
於是我就開始學 js、CSS、jQuery 同 Bootstrap，會用佢哋起手因為我幾年做 Intern 嗰陣畀個同學氹咗入坑。冇佢，我嘅實習唔會咁 fun，都唔會開始寫 web。
之後都沉迷咗一排 React，但因為我用 Windows 機，後來我搵到工之後，基於工作因素有一排要瘋狂搬機，我又冇興趣研究點樣將個 project 搬嚟搬去；再加上呢啲嘢同我份工九唔搭八；另外有一排我唔中意 Facebook，我知道咗 React 係 under Facebook 之後唔係好想用，於是就荒廢咗。
喺當中我開始接觸到 git，再嚟就係 Markdown，我發現就算我唔寫 code，Markdown 都會係我嘅好朋友，就算最近興起咗好多 Markdown 同 WYSIWYG 共存嘅 project，我始終覺得佢哋係敵人嚟。
所以當我遇到 Joplin 嘅時候，我就知道我應該要跳船了。然後慢慢我都習慣咗用 Markdown 寫 notes。
但又慢慢地我開始唔知自己做緊乜，一直窮忙，notes 亦都逐漸荒廢。直到我中咗肺炎，我嘅人生就好似癱瘓咗咁，終於識得停低下。
好返之後，多咗好多奇怪嘅後遺症，佢哋好輕微，但係就好煩。我個腦都開始轉唔到。
或者將我做過嘅事情記低，畀自己睇返，畀人哋睇返，我就可以回顧下自己嘅生命，唔使好似一片空白咁。
Idea
入 Markdown 出 website :0)
Hugo and Joplin
我苦惱咗好多嘢。
個 site 要擺邊度？點樣先至好睇？我係咪要由零開始揼？使唔使 reg 返個 domain 嚟用下先？擺唔擺到廣告？
但當我開始寫咗幾篇文，我覺得好快樂，我知道呢啲都唔係問題，總之就做咗先啦。
正如上面所講，我用嘅係 Joplin，寫完之後我就揀 Export > Markdown + Front Matter。
咁我就有晒 content 可以用，但個底都仲係未解決，於是我就搵下有冇啲好用嘅底，一搵就係幾日。
懶惰嘅我真係唔想又再跌入無謂嘅 syntax game 入面，返工已經夠多，個腦好攰。我見 Hugo 有 Binary 可以用，好似好方便咁，咁就揀咗，點知就出事嘞。
我跟住佢啲 Get Started gen 咗個 site 出嚟，又加咗個 theme 落去，然後入面啲嘢我從來都未見過。完全唔知咩嘢 toml, 我連 yaml 都未識撚，淨係識 JSON。
撚咗一大輪，我覺得今時今日搞 website，module 係應該入晒血，要將所有嘢都變晒做 module，然後又整啲再簡化咗嘅 syntax 去用返啲 module，真點 syntax game。
呢個話題我同朋友同事都有傾過，結論係我唔係一個 program 人，我真係唔中意追 language。
接下來就係懶惰嘅問題，我係冇可能每次出文都㩒下 export，再手動搬上 site，但今日好攰，我選擇下次先算。
總知用到就得啦，喺本地成品尚可接受，依家就試埋擺 GitLab，希望成功。
- 完 -