今日終於的起心肝改咗下個版面，以此作簡單的記錄。
Before
After
大要
今次更新純粹想加返 Laboda 條 link 落去。
但個 project 成年冇郁過，唔知中間 React 同 Node.js 發生咗啲咩嘢巨變，總知就 ren 唔返個 website。而我又一直都冇抽時間出嚟 troubleshoot，於是我就把心一橫，將成個 project 用個 plain HTML 取代咗佢。
圖方面我用咗文字嚟代替。
Style 方面冇咩可以講，原則嚟自呢個網站。
後記
其實呢個行動某程度上都反映緊我目前嘅狀態 - 我只想簡簡單單，將所有事情都最小化。
與其花時間喺啲不切實際嘅嘢上面，倒不如專注於真正嘅目的，用最簡單嘅方法做咗佢。
曾經都有幾個 project 仔我仲諗住得閒再 update，但隨住日子過去，我知道我唔會再掂佢哋，因為我暫時冇任何理由再去加新嘢落去，我都唔太需要佢哋。
尤其係開始咗做 support 呢份工之後，見多咗各種各樣嘅需求，其中都有啲要短時間內解決，更加鼓勵咗即食文化，見到咩嘢 tool 啱用就拎嚟用，左拼右砌，唔太需要由零開始。
但我唔係否定緊呢三個月入面對 React、Node.js 等等嘅投入 - 甚至正正因為我玩咗三個月 JavaScript，對我現時嘅工作有莫大嘅幫助。
而我亦都唔係以後唔再寫或者改良我啲 web app，事實上我喺工作方面都整咗啲小工具畀自己用，只係個 focus 唔再係整到啲嘢好 fancy，而係實用為主。
- 完 -