呢排對於點樣用 Hugo 同埋我一堆所謂 web app 上面嘅處理，有啲新嘅睇法，並且帶來咗今次搞咗超過一星期嘅更新。
最近搵工，發現幾年前整嚟搵工啲小工具唔太好用；再加上個 page 好樣衰，personal site 同個 blog 風格不一致，又分咗做兩個 GitLab project 嚟搞；個 blog 又有好多奇怪問題，於是想一併過處理下。
以下會分別講下今次更新嘅幾個重點。
On Your Mark
萬惡之源都係搵工，而搵工少不免要 update 一下份 CV。開返舊版 On Your Mark 出嚟睇，覺得好鬼難用。
（我唔捨得成個冚咗佢，想留返條屍喺度鞭下，從而引申出小許苦惱同影響咗之後嘅做法）
要 download 個 Markdown template 落嚟改嘢，再 upload 上去，再 download 返落嚟，太多嘢搞喇。仲要 print 嗰陣好有問題，上面個 sidebar 唔知點解走咗出嚟，我印象中係試過晒冇事，但到幾年後用返就發現呢個問題依然存在。
原本諗住啲 Markdown editor 如此盛行，不如求其搵個 StackEdit、HackMD 之類 export 咪算數。但咁樣實在係太冇特色，唔夠好睇。
於是就有新版 On Your Mark 嘅誔生，textarea 加 oninput，就係咁簡單。連手機版都費事整，因為我整畀自己用，我 update CV 未至於連電腦都唔肯開。
呢單嘢用得最耐唔係整個 app 本身，而係個 example。初頭諗住唔好又 HOM Ka Ling 喇，呢條友冇咩內容，喺舊版上面個 example 出到嚟效果都唔好睇，不如好好地整返個 IT 狗 John Doe 用下。
點知搞搞下就變咗幫 Stuart 寫 CV，雖然好戇鳩好浪費人生，但 Stuart 份 CV 真係不得了，我都想斥巨蕉請佢返嚟做嘢。
合併 Personal site 同 Blog
呢個決定一開始實行時會超級痛苦，但之後管理上應該會便利咗。
- 將 Laboda 個 Project 嘅 CI/CD 停咗佢，改為喺 GitLab Pages 個 Project 上面行。
- 將之前用 plain HTML 寫嘅 landing page 分拆開，放到 Hugo 嘅
_index.md、home.html同埋其他組件入面。 - 撇去 theme folder，自己 layout 自己話事。
- 將之前寫嘅文章重新檢視，修改下並搬到新結構或下架。
Hugo without a theme
一年過去，我對呢樣嘢嘅想法都係冇變 - 啲 theme 真係樣衰到冇人有啊！上次改又改到不倫不類咁，與其係咁倒不如以 landing page 作為中心展開，自己動動手，統一下兩邊嘅風格。
初頭係諗住 raw 啲自己寫堆 CSS 就算數，但去到後面就發現搞唔掂，至少都要有 Bootstrap 充撐一下場面，自己寫真係有排都寫唔完，唔用都唔知原來已經 Bootstrap 5。
我係一個極度害怕排版嘅人，因為我會永無止境咁改，改極都仲係有嘢想改，有時明明係搵緊一樣嘢，見到第二樣嘢又會畀佢 shift 咗 focus。整體而言，我對呢個版本係滿意嘅，要有嘅嘢都有，同埋我自己覺得唔樣衰就夠。
資訊量太多，由 syntax 到 feature 都有好多知識點同主意，有時間先至再整理同分享。
文章結構、排版與下架
所謂結構係指圖文嘅位置，之前有啲遷就 Joplin export 出嚟嘅格式去處理，將所有圖同文都分別放喺唔同位置，炒埋一堆，圖又係隨機命名。令到我想搵返邊幅圖對返邊一篇文都有難度。
睇完 Hugo new theme default 嘅結構就嘗試跟住做，圖文喺晒個別 folder 入面，用一篇文做單位去存放，比較容易管理。
排版方面，完全唔想睇返以前啲文，冇排版可言。有參考下中文文章排版嘅貼士，嘗試緊寫啲就算冇咩內容，望落都舒服，未至於唔想睇落去嘅文章。
更新前 Laboda 上面有 10 篇文章，其中有 4 篇有太多圖同好似冇咩用嘅資訊，暫時將佢哋下咗架，而其他都改過入面嘅結構、用字甚至標題等等再重新發佈過。
新搞作嘅發佈方式
喺上一次更新提到過冇咩使用 framework 嘅需求，基本上冇嘢係用一個 HTML file 搞唔掂。暫時都冇 pick up 返 framework 嘅打算，之後如果有新想法應該都會放到呢個 Project 入面，用 Hugo 入面其中一個 page 嘅形式去發佈，而 On Your Mark 就係第一個行呢一套嘅產物。
結語
我覺得自己都幾犀利，啲嘢諗得到又做得到。
過去一系列嘅事情令我對自己冇晒信心，覺得自己做咩嘢都唔得。
但原來一個咁嘅爛鬼網頁都會有人欣賞，聽到有人講得出自己用心做嘅嘢有啲感動。
希望之後都可以捉住呢份感動，有更多創作同進步。
- 完 -